دارين حلمي توضح سبب انفصالها عن تامر عاشور

كشفت دارين حلمي، خطيبة المطرب تامر عاشور السابقة، سبب انفصالها المفاجئ عنه، بعد ظهور شائعات واتهمات ضدها في الفترة الأخيرة.

وقالت: "مش دارين اللي تاخد راجل متجوز أو تكون سبب في خراب بيت حد وبالتالي مليش ذنب في أي حاجة".

وكتبت دارين عبر حسابها الشخصي بموقع تبادل الصور والفيديوهات المشهور "إنستجرام": "تامر دخل البيت من بابه واتقدم لأهلي رسمي على أساس إنه مُطلق وده اللي أنا كنت فاهماه زي زي جمهوره، عادي إن بنت ترتبط براجل مُطلق مش أزمة، وحصلت الخطوبة بشكل رسمي زي ما عرفتوا ومشيت الأمور في مجراها الطبيعي لحد ما بالصدفة اكتشفت إن لسة زوجته على ذمته وفيه قضايا بينهم ولم يتم الانفصال بشكل رسمي".

وتابعت: "أي بنت في الموقف ده طبعًا لازم تنسحب مهما كان الحب ومهما كانت العواطف لأن مش دارين حلمي اللي تاخد راجل من زوجته مهما كان هو مين (كده كده أنا كنت مستمرة في مسابقات ملكات الجمال وليا الكاريير الخاص بيا)، فكل مرة بقرر الانسحاب كان تامر بيرفض، وإن كده كده الطلاق قائم سواء أنا في حياته أو لأ وده مش يخصني في شئ".

وأكدت: "في الاخر أنا صممت على فسخ الخطوبة بمنتهى الاحترام ما بيني وبينه لأنه مينفعش و كل التوفيق والنصيب بإيد الله، ربنا يوفقه في حياته ويوفقني في خطواتي الجاية إن شاء الله".

واختتمت دارين حلمي: "تامر إنسان محترم مشفتش منه غير كل خير واحترام وحب، وأنا بحترمه على المستوى الفني والشخصي، لكن ده نصيب وربنا يوفقه في حياته، وأتمني محدش يتكلم في حاجه ميعرفش تفاصيلها، وشكرًا لكل الناس اللي بتحبني وعرفاني كويس، أظن أنا جاوبت على كل حاجة و مش هفتح الموضوع ده تاني نهائي أرجو احترام موقفي".