البياضي: الحكومة زي الأم اللي مش قادرة تهتم بأولادها فجابت لهم مرات أب!

علّق الدكتور / فريدي البياضي عضو مجلس النواب و نائب رئيس الحزب المصري الديمقراطي الاجتماعي على قانون منح التزام المرافق العامة لإنشاء و إدارة و تشغيل وتطوير المنشآت الصحية قائلاً:
في البداية لازم أتوجه بالشكر للمواطن الغلبان العيان انه لسة عايش لغاية دلوقتي ومستحمل اللي بتعمله فيه الحكومة! و اكمل النائب : لازم أؤكد على اللي قلناه قبل كدا بأهمية تواجد القطاع الخاص و مشاركته في الاقتصاد و الاستثمار ، لكن في فرق شاسع بين ان الحكومة تشارك القطاع الخاص و بين ان الحكومة تتخلى عن مسئوليتها و التزامها الدستوري برعاية المواطن و خدماته الصحية و تجيب خواجة يقوم بيها! الحكومة بتغطي ٨٨٥٩٧ سرير . بتشكل ٧٠٪؜ من الأسرّة في القطاع الصحي ، ما عنديش مشكلة ان الخواجة ييجي يعمل لي مستشفيات جديدة و يزود خدمات، لكن لا يستحوذ على مستشفيات شغالة بالفعل . الي هاييجي ها يختار أحسن المستشفيات و أفضل الأماكن، النهاردة الحكومة جاية تتخلي عن مستشفيات زي معهد ناصر ، زي مدينة نصر للتامين الصحي زي زايد التخصصي؟! و أضاف النائب : بدل ما تبيعو للخواجات، بطلو تحطو تعقيدات ، بطلو تعقيدات التراخيص للقطاع الخاص و القطاع الاهلي الوطني اللي عايز يشتغل . القانون دا كارثي! أنا بارمي المواطن الغلبان في أيد خواجات و استثنيتهم من قانون منح الالتزام للمرافق العامة الي كان بيحط ضوابط و سقف للأرباح. القانون ما حطش آلية لتسعير الخدمات. القانون بيسمح للمستثمر انه يستغنى عن ٧٥٪؜ من العاملين في المستشفيات و يشرّدهم . الحكومة عملت زي الأم اللي مش قادرة تهتم بأولادها فبتقول لهم معلش أنا مش قادرة و هاجيب لكم مرات اب يمكن تراعيكم!
مشكلة القطاع الصحي زي باقي قطاعات الدولة مش في الملكية ، المشكلة في فشل الإدارة ! لو انتو فشلتو في الإدارة يبقى ما تبيعوهاش، و تبيعو المواطن العبان الغلبان، لكن تلمو نفسكم و تمشو و تجيبو حد تاني يديرها.
واختتم النائب تعليقه قائلا: القانون مرفوض و السياسة مرفوضة و الحكومة مرفوضة